Hinn 10. maí 1940 urðu þáttaskil í sögu Íslands, en aðfaranótt þess dags steig breskur her á land í Reykjavík. Í Evrópu hafði heimsstyrjöldin síðari geisað í átta mánuði. Þjóðverjar höfðu ráðist inn í Pólland, hernumið Danmörku og Noreg og innrás vofði yfir Niðurlöndum og Frakklandi. Það var Bretum mikil nauðsyn að Ísland félli ekki undir þýsk yfirráð, en það hefði haft slæm áhrif á hernaðarstöðu þeirra á Atlantshafi. Ísland stóð ekki lengur utan hringiðu heimsviðburðanna.

Skoskir hermenn ganga framhjá yfirmönnum breska setuliðsins sumarið 1941. Ljósmynd Skafti Guðjónsson (1902-1971). Ljósm./Ljósmyndasafn Reykjavíkur.

Þessi vefur Ljósmyndasafns Reykjavíkur og menningardeildar Ríkisútvarpsins geymir ljósmyndir og hljóðrit sem tengjast hernámsárunum á Íslandi. Hljóðrit á vefnum eru á Mp3 formati og ætti því að spilast á öllum tölvum.