Bæjarbúar fylgjast með umsvifum breska hersins við Reykjavíkurhöfn 10. maí 1940. Ljósmyndari Ólafur Magnússon (1889-1954). Ljósm./Ljósmyndasafn Reykjavíkur.

Eitt af því fyrsta sem breska hernámsliðið gerði í Reykjavík var að handtaka þýska ræðismanninn og þá Þjóðverja sem Bretar töldu hættulegasta. Einnig lokuðu þeir um tíma helstu vegum til borgarinnar og tóku á sitt vald helstu miðstöðvar fjarskipta, það er Loftskeytastöðina, pósthúsið, Landssímann og Ríkisútvarpið. Reykjavík var þannig einangruð og íbúar landsins vissu ógjörla hvað þar var á seyði.
Í för með hernum var breskur sendiherra til Íslands og átti hann fund með íslensku ríkisstjórninni. Hún mótmælti þessu broti á hlutleysi landsins en Bretar lögðu áherslu á friðsamlega sambúð. Síðar um daginn las Helgi Hjörvar fréttir í útvarpinu, þar á meðal tilkynningu frá yfirforingja hernámsliðsins sem dreift hafði verið til Reykvíkinga. Um kvöldið flutti Hermann Jónasson forsætisráðherra útvarpsávarp þar sem hann skýrði þjóðinni frá viðburðum dagsins.