Íslandssöguvefurinn hófst með samstarfi Ríkisútvarpsins og Ljósmyndasafns Reykjavíkur snemma árs 1998. Fljótlega bættist Kvikmyndasafn Íslands við og seinna Þjóðminjasafnið. Samstarfið miðar að því að endurskapa eftirminnilega atburði úr Íslandssögu þessarar aldar með möguleikum margmiðlunar. Tilgangurinn er að auka fjölbreytni íslensks efnis fyrir almenning á Netinu, ekki síst efnis sem nýst getur í almennu skólastarfi.

Á þjóðræknisþingi Þjóðræknisfélags Íslands þann 27. nóvember, opnaði Hr. Ólafur Ragnar Grímsson forseti Íslands, Vesturfaravefinn, nýjan kafla í Íslandssöguvefnum. Á þessum vef er stiklað á stóru í sögu vesturferðanna, dregnar fram persónulegar heimildir og skáldskapur sem varða ólíkar hliðar þeirrar sögu og varpað ljósi á aðstæður vesturfaranna og afkomenda þeirra í Kanada og Bandaríkjunum.

Á 100 ára afmælisdegi tónskáldsins Jóns Leifs, 1. maí 1999, bættist nýr kafli í Íslandssöguvefinn. Vefurinn um Jón Leifs er samstarfverkefni Ríkisútvarpsins og Íslenskrar tónverkamiðstöðvar. Fleiri hafa komið að gerð hans en við aðra kafla í Íslandssöguvefnum og má þar nefna Ljósmyndadeild Þjóðminjasafns Íslands, Handritadeild Landsbókasafns Íslands-Háskólabókasafns, Sinfóníuhljómsveit Íslands, FÍH, STEF, Tónskáldafélag Íslands ofl.

Þriðja skref Íslandssöguvefsins var Lýðveldisvefurinn sem opnaður var 17. júní 1998.  Hinn 17. júní 1944 varð Ísland lýðveldi. Á þessum vef er leitast við að endurskapa andrúmsloftið á Þingvöllum þennan sögulega rigningardag auk efnis frá hátíðinni sem haldin var á Þingvöllum 1994 í tilefni af 50 ára afmæli lýðveldisins.

Annað skref var að opna vef sem helgaður er hernámsárunum á Íslandi. Þar má sjá ýmsar athyglisverðar ljósmyndir og hljóðupptökur sem tengjast þessu mikla umbrotaskeiði í lífi þjóðarinnar.

Fyrsta skref var opnun vefs um Bókmenntaverðlaun Nóbels árið 1955. Þar gefst fólki kostur á að taka þátt í þeim mikla fögnuði sem ríkti þegar Halldór Kiljan Laxness hlaut nóbelsverðlaunin í bókmenntum. 


Hljóðritin og kvikmyndabrotin eru í RealAudio-/RealVideo-formi og þarf þar til gerðan spilara við vefskoðara svo hægt sé að hlusta á þau. Mælt er með því að notendur endurnýji Real-spilara sína (a.m.k. ef núverandi spilarar eru eldri en útgáfa 4.0). Kvikmyndabrotin eru aðgengileg á tveimur formum, annars vegar fyrir notendur sem hafa 28.8K mótald, hins vegar þá sem hafa 56K mótald eða öflugra, ISDN tengingu eða tengjast Netinu í gegnum innranet fyrirtækis eða stofnunar.